Archive | April, 2011

Fundur í félagi 100 km hlaupara!!

27 Apr

Dagsetning: 12 maí, fimmtudag, kl. 20.00.
Staður: Stóri salurinn í íþróttamiðstöðinni í Laugardal (húsakynni FRÍ og ÍBR).
Dagskrá: Inntaka nýrra félaga, hlaupið 11. júní, og önnur mál.
Félagar eru hvattir til að fjölmenna. Fá félög eru með jafn ströng inntökuskilyrði og þetta og því sómi að tilheyra því.
Komaso!

Advertisements

Sæbjörg Logadóttir

26 Apr


Sæbjörg Snædal Logadóttir er fædd árið 1977. Hún er gift tveggja barna móðir og vinnur sem sjúkraliði á Heilbrigðisstofnunni í Vestmannaeyjum.
Sæbjörg stimplaði sig rækilega inn í ofurhlaupaheiminn þegar hún tók 100 km á bretti í desember 2009. Var eftir því tekið hve góðum hraða hún hélt allan tímann og þótti mönnum mikið til um. Hún hefur annars stundað líkamsrækt í mörg ár og æfir reglulega í líkamsræktastöðinni Hressó. Hlaupaferillinn hófst annars ekki fyrr en árið 2005 og vinsælast er hjá henni að hlaupa hringi í kringum eyjuna fögru. Sæbjörg á að baki heil og hálf þon og varð þriðja í síðasta RM, sem hún átti ekki von á en kom öðrum ekki á óvart.
Sæbjörg er brettahamstur eins og Gunnar Ármannsson, en hlakkar til að hlaupa 100 km í góða veðrinu sem verður án efa 11. júní. Þátttaka hennar tryggir spennandi keppni í kvennaflokki.

Ágúst Guðmundsson

18 Apr


Ágúst Guðmundsson er til hægri á þessari mynd með Arnaldi Birgi Konráðssyni, félaga sínum í BootCamp. Þarna voru þeir að æfa fyrir þátttöku í margra daga eyðimerkurþoni sem var síðan blásið af vegna átaka á svæðinu.

Ágúst er eini keppandinn sem hefur beðið um XL bol. Þar með ætti frekari kynning að vera óþörf.

Ágúst er ekki þessi “klassíska” hlaupatýpa, eins og hann segir sjálfur, en það hefur síður en svo háð honum í þeim verkefnum sem hann hefur tekið sér fyrir hendur hingað til. Hann er talsmaður fjölbreyttrar þjálfunar, er að upplagi BootCamp-maður og þykir ákaflega hraustlegur utan um sig.

Þetta er annað 100 km hlaup Ágústs og hann stefnir á að bæta tímann sinn frá 2008, en aðalatriðið verður að eiga góðan dag í hópi kraftmikilla hlaupafélaga sem hafa lagt á sig mikla vinnu til að vera í sem bestu formi þann 11. júní nk.

“Draumaveður á hlaupadegi væri t.d. 12-15 stiga hiti, logn og léttur úði að hætti hússins ! ;-). ” Hlaupstjórn hefur fjallað um þessa beiðni Ágústs og stefnt er á að verða við henni.

Jón Páll Pálsson

17 Apr

Jón Páll Pálsson gegnir mörgum hlutverkum í tilverunni. Hann er þriggja barna faðir og eiginmaður, kvikmyndatökumaður hjá RÚV og byrjaði að hlaupa 2008 en hefur síðan safnað í reynslusarpinn, klárað sjö þon, Laugaveginn, Hálfkarlinn og horfir til hundraðkallsins einkum með það í huga að athuga hvað hann kemst langt. Það er góður siður íþróttamanna að láta reyna á þolmörk sín og Jón Páll nýtir þetta tækifæri eins og önnur. Ef vel tekst til, setur kappinn stefnuna á Ironman að ári.

Jón er listamaður í eðli sínu og ber prófílmynd hans þess glöggt vitni.

Karl G Gíslason-Dísiltrukkurinn

16 Apr

Kalli hugsar alltaf stórt og hér kemur fyrsti kaflinn í sögu hans. Hann hefur lengi haldið úti vefsíðu sem er ekki eins virk og eigandinn. Þar eru myndir af kappanum. Kalli er líka á Fésbókinni.

“Sagan hefst í raun í Danmörku þar sem ég hafði ákveðið að skella mér í hjólatúr um Evrópu svona í kringum 5000 km. túr. Hann varð þó aldrei lengri en 3333 km að endingu. En afhverju skildi ég vera að þusa um einhverja hjólaferð, enn þannig var mál með vexti að ég var alltaf að leita að lausnum að létta hjólið mitt fyrir þessa miklu reisu. Eftir tveggja mánaða pælingar og miklar gramma mælingar var ég kominn með lista af hlutum sem ég ætlaði að skipta út á hjólinu mínu. Ég lagði á stað í bæinn og var staðráðinn í að klára þetta verk. Þegar ég var kominn í hjólaverslunina fór ég beint til afgreiðslumannsins sem ég var vanur að versla við, sýndi honum listann og ætlaðist til þess að hann týndi það til sem á honum stóð. En viti menn hann horfði á mig og sagði hvers vegna ætlar þú að kaupa þetta og ég sagði eins og var ég ætla að létta hjólið mitt fyrir langa ferð. Þá sagði hann ósköp rólega um leið og hann potaði í bumbuna á mér, þegar þú ert búinn að létta þig um nokkur kíló komdu þá aftur og ég skal selja þér þetta. Það voru góð ráð dýr ég var búinn að berjast við nokkur aukakíló en ekkert gekk.

Hefst nú hlaupasagan: Ég fór sneyptur heim og hugsaði og hugsaði, skyndilega varð mér það ljóst að ég yrði að fara út að hlaupa til að bæta við hreyfinguna. Ég mældi nokkra hringi í hverfinu, einn sem var tveir km., annan sem var um þrír km. og þann þriðja sem var alveg svakalega langur næstum fimm km. Ég vissi ekkert um hlaup og setti mér alskonar tímamörk í hlaupunum t.d. að hlaupa þrjá km. á tíu mínútum sem ég að sjálfsögðu náði ekki þó var besti tíminn minn um ellefu mínútur. Ég loksins fór að léttast og að sjálfsögðu mætti ég ekki aftur í búðina til að kaupa þessa rándýru léttu hluti sem ég var búinn að finna.

Hjólaferðinn var farinn og gekk hún vel fyrir sig en það er efni í heilabók. Ég flutti heim aftur og hélt áfram að hjóla eins og það væri enginn morgundagurinn. Einhvern tíma sem ég get ekki staðsett í tíma fékk ég líka þessa góðu hugmynd ég ætla í Ironman.

Ég byrjaði að æfa á fullu, hjóla 40 til 50 km. á dag að lágmarki, hlaupa 7,5 km. og synda 1-2 km. Ég átti ekki bíl á þessum tíma þannig að kílómetrarnir voru fljótir að teljast inn. Þetta gerði ég í tvo mánuði án þess að taka mér hvíldardag. Svo gerðist það óhjákvæmilega álagið varð of mikið, ég kominn með öll einkenni ofþreytu og lagðist í þunglyndi. Neyddist til að hjóla áfram en sleppti hinu. Þannig mókti ég heilan vetur. Með hækkandi sól efldist andinn og trukkurinn tók við sér fór að taka þátt í hlaupum sem að endingu leiddi mig inní Grafarvogshópinn hjá Erlu Gunnarsdóttir. Ég fékk gott uppeldi þar hjá góðum fólki og náði fljótt nokkrum tökum á hlaupunum. Síðan varð það einn daginn sem ég ákvað að hætta í Grafarvogshópnum og byrja í Vesturbæjarhópnum.

Fyrsti dagurinn í Vesturbæjarhópnum var mjög undarlegur. Ég mætti á réttum tíma og beið í andyrinu á lauginni og var greinilega fyrstur. Síðan mættu einhverjir hlaupalegir menn á staðinn og ég spurði eruð þið í hlaupahópnum. Þeir svöruðu því til að það væru þeir, síðan var ég ekki virtur viðlits. Nákvæmlega klukkan 18:30 var farið að stað. Ég hljóp að sjálfsögðu með og ekki enn voru menn að eyða orðum í mig. Ég reyndi að halda í við þá en það var eins og þeir væru að reyna að stinga mig af. Það var farið eins og leið lá inní Öskjuhlíðarskóg þar sem þeir stungu mig af. Ég fann þá aftur þar sem þeir voru á leiðinni til baka inní laug. Þannig gekk þetta í nokkur skipti þar til að þeir sáu að ég var ekki að gefast upp. Þetta var haustið 1997 og ég mættur í mitt fyrsta maraþon 28. mars 1998. Það var ekkert verið að draga neitt úr þessu og ég endaði að tímanum 3:46:54 í fyrsta þoninu. Síðan eru þau orðin í heildina 37 maraþon 6 sinnum Laugaveginn, nokkur hálfmaraþon og allar vegalendir sem í boði voru.

Besti tími í maraþoni 3:22:30 í Kaupmannahöfn, besti tími á Laugaveginum 6:07:54 og einu sinni hundrað km. á 11:35:34. Sagan mín er öll á netinu þannig að ef þið viljið athuga hana þá er ekkert mál að nálgast hana þar. Frh. Síðar.

Jóhann Gylfason

15 Apr

Jóhann er hokinn af hlaupareynslu og hefur margan orkudrykkinn sopið. Þetta á reyndar líka við um fleiri keppendur en hljómar alltaf jafn vel. Hann er á besta aldri, 47 ára og hóf ferilinn með Árbæjarskokki/HÁS, en þar er Herra Formaðurinn aðal. Þetta var árið 2002 og fyrsta maraþonið lá árið eftir í Búdapest. Nú æfir Jóhann með ÍR. Jóhann á 15 þon að baki, þar af 14 erlendis og besta tímanum náði hann í Lundúnum, 2008 2:47:26.
Jóhann hefur hlaupið Laugaveginn tvisvar og árið 2009 á 5:10:09, sem er í skárri kantinum á þessari leið. Hann hefur alltaf haft meiri áhuga á maraþoni en stuttum hlaupum og miðar æfingar við það.
Kunnugir telja að Jóhann muni blanda sér í toppbaráttuna í hlaupinu á góðum degi, en veðurfræðingar telja almennt að 11. júní verði góður veðurdagur.

Máni Atlason

15 Apr

Máni skrifaði aðalritaranum svo kjarnyrta kynningu að við hana er litlu að bæta:

“Ég er að ljúka laganámi nú í vor við Háskólann í Reykjavík og hef æft BootCamp um nokkurra ára skeið og stundað langhlaup samhliða því. Ég á að baki maraþonhlaup, tvö Laugavegshlaup og auk þess tók ég þátt í því ásamt öðrum BootCamp-liðum sem eru skráðir til leiks í hlaupið í sumar að setja heimsmet í Latabæjarhlaupi í vetur þegar hlaupnir voru 22 Latabæjarhringir í röð og verður það met ekki slegið í bráð.

Ég er með pottþétt plan fyrir langa hlaupið í sumar sem ég er ætla að deila með fólki í trausti þess að enginn steli hugmyndinni frá mér. Planið er að hlaupa fyrst 20 km, hlaupa svo aðra 20 og hlaupa 20 km strax eftir það. Hlaupa svo bara 15 km (sem er styttra en 20 km svo það verður ekkert mál), hlaupa svo aftur 15 km og þá eru bara 10 eftir og það er nú helmingi minna en 20 km svo það verður varla neitt mjög erfitt. Ef síðustu 10 km verða mjög erfiðir gæti verið að ég sleppi því að hlaupa þá og hlaupi bara tvisvar sinnum 5 km í staðinn, af því það er auðveldara að hlaupa 5 km en að hlaupa 10 km. Og ef þetta verður mjög mikið basl þá treysti ég á góðan stuðning BootCamp félaga minna þar sem Blöndalinn, Golíat, Pretty Boy, Skriðjökullinn og Kölski verða öll á staðnum. Við stöndum saman í þessu og þá verður þetta ekkert mál.”

Máni er á Fésbók.